政情：李剛出任基委會委員
中聯辦副主任李剛尋日有新任命啦！不過唔係傳聞中北調接替國務院港澳辦主任廖暉，而係出任基本法委員會委員。呢次李剛進入基本法委員會，官方話係接替舊年退休嘅原中聯辦第一副主任王鳳超，但究竟當中有無玄機呢？
廖暉退休嘅傳聞一直甚囂塵上，盛傳喺政改一役中擔大旗同民主派溝通嘅李剛都係人選之一，早幾日李剛出席活動時仲笑對呢個傳聞，話冇人同佢講有新任命。點知尋日全國人大常委會就通過李剛有新任命，大家都好緊張佢嘅新動向，不過原來只係任命佢為基本法委員會委員。
中方消息解釋，呢次只係正常人事調動，事關王鳳超擔任基本法委員會委員一職，係由於佢為原中聯辦副主任，如今王鳳超退下火線，由李剛接手佢嘅工作，於是李剛咪順理成章進入基本法委員會囉，只係呢個任命喺程序上必須由全國人大常委會通過，所以放咗喺今次人大常委會嘅議程中咁解。至於基委會正副主任及其他委員，則維持不變。