政情：肥胡向愛心醫護致敬
醫管局派出嘅八人境外醫療支援隊，連日來喺馬尼拉全力協助挾持人質事件中嘅傷者及家屬，當中兩名隊員包括屯門醫院腦神經外科部門主管方道生及腦神經外科資深護師梁燕妹。醫管局主席胡定旭尋日講開今次拯救行動時，就大讚屯門醫院有好多愛心醫生同護士，除咗方道生醫生外，仲有臨床心理科聯網統籌專員何鳳珠博士（Candace）。
為腦部受重創梁頌學治療嘅方道生，相信大家都認識，佢自七九年港大醫學院畢業後，就投身公立醫院工作，至今已有三十一年，係數一數二嘅腦外科資深顧問醫生。至於有份協助輔導傷者及家屬心理、近日一直全力輔導幸存者梁太嘅Candace，就參與屯門醫院進心會兒童及家庭哀傷輔導服務超過十年，協助失去父母嘅孩子面對死亡，佢參與嘅團隊兩年前就榮獲醫管局傑出團隊獎項。
肥胡話，今次所有參與拯救行動嘅隊員，都係醫管局質素及安全總監梁栢賢親自點將，並徵詢行政總裁蘇利民意見。肥胡話，屯門醫院仲有位著名泌尿科顧問醫生朱秀群，佢多年來致力研究Ｋ仔（氯胺酮）對泌尿系統損害，發現長期吸食Ｋ仔嘅病人有尿頻情況，警醒年輕人遠離毒品。眾所周知，屯門嘅窮人較多，人口密集，而且較為偏遠，難得出咗咁多愛心醫生及醫護人員，難怪肥胡印象深刻喇。