政情：扮嘢文唔敢投資菲律賓
中環蘭桂坊係熱門蒲點，去得呢度唔多唔少會飲番杯輕鬆吓，每晚蒐集到嘅酒樽可以話堆積如山。民建聯同蘭桂坊協會聯同兩個環保團體，前晚喺蘭桂坊搞咗個玻璃樽回收行動，藉此鼓勵餐廳酒吧主動回收玻璃樽。有「扮嘢文」之稱嘅蘭桂坊協會主席盛智文前晚為活動擔任主禮嘉賓，一到場就畀班青年義工團團圍住合照，好受歡迎，十足海洋公園嘅大熊貓咁。
香港旅行團浴血菲律賓，相信唔少港人都感同身受；扮嘢文來港四十三年，絕對係香港一分子，佢形容呢件事係可怕嘅悲劇，令人好悲傷同沉重，佢好擔心所有受影響嘅家庭同遺孤。講開又講，發生慘劇當日，扮嘢文原來喺泰國布吉島，當地電視都有播放呢段消息，而佢喺慘劇發生第二日亦已返到香港，期間一直有留意事態發展。
扮嘢文生意遍及多個國家，原來佢廿五年前曾經喺菲律賓開設辦事處，但因為當地社會同政局不太穩定，最終都結束咗辦事處，依家喺當地冇任何投資。對於今次港府嘅處理手法，扮嘢文覺得算唔錯，慶幸政府吸取咗當年遲遲唔派包機去泰國接香港人嘅教訓，更加希望呢種經驗以後都用唔着。