政情：台灣傳媒當鬍鬚曾透明
財政司司長「鬍鬚曾」曾俊華尋日以港台經濟文化合作協進會榮譽主席身份，首次訪問台灣，係咁耐以來官階最高嘅特區政府官員訪問台灣，同行仲有協進會主席、行政會議成員李業廣，身兼副主席嘅商務及經濟發展局局長劉吳惠蘭和另一協進會副主席、全國政協委員李大壯。港府陣容鼎盛，加上今次訪台意義非凡，唔少香港傳媒都派人去台灣跟進，點知台灣傳媒就當訪問團透明，尋日只有兩個台灣記者去採訪港府訪問團抵台情況，以陸委會港澳處處長朱曦為首嘅接待團亦只得五個人，場面冷清得可以。
台官責奇怪保守
台灣傳媒行家竊竊私語話，鬍鬚曾又唔係特首，又唔係中央高官，預計唔會好似前兩年大陸海協會副會長張銘清訪台時咁畀人襲擊，民進黨尋日亦冇組織人到場示威，所以傳媒對佢嘅興趣不大，加上鬍鬚曾唔少行程都係閉門進行，大家都諗住等到戲肉、即係協進會同台港經濟文化合作策進會舉行聯席會議先報道喎。雖然香港記者佔大多數，但鬍鬚曾到台後同記者講話全程用廣東話，當另外兩個台灣記者冇到，認真唔識做。
鬍鬚曾仲唔止得罪台灣媒體咁簡單，連台灣官員都私底下發牢騷，話鬍鬚曾好奇怪、好保守，直至前日先確認到訪台灣頭兩日嘅行程，搞到佢哋手唔成勢，一啲都唔跟「客隨主便」嘅傳統。港台兩地嘅傳媒一早就報道，今次鬍鬚曾此行會與台灣行政院長吳敦義及陸委會主委賴幸媛見面，不過從來都唔知幾時見。台灣官方放口風話，鬍鬚曾聽日會見賴幸媛，後日會見吳敦義，但又埋怨港方到依家都唔肯確認見面時間，搞到大家都麻煩。
會面安排好似好混亂，到底台港雙方邊個責任大啲，就只有佢哋雙方最清楚；不過港府高官訪台鍾意玩保密，就確實唔係咩新聞。好似政制及內地事務局局長林瑞麟（林D9）去年六月第一次以官式身份訪台，一開始好多行程都係閉門進行，透明度極低，最後仲畀當地傳媒踢爆，佢原本話係去故宮參觀，但竟然偷偷去咗同陸委會高層會面。今時今日乜都講透明度，要促進港台關係發展，唔係靠閃閃縮縮見個面就得架！