中環出更：肥亨感激好友為追思會出力
為悼念菲律賓遇難嘅無辜港人，基督教團體「全城更新」尋日喺中環遮打花園舉行大型追思會，但追思會只得兩日時間籌備，主席王培琪（Linda）幸得身為中策集團主席嘅老公馬時亨全力協助，才得以功德圓滿。肥亨喺政商界人面甚廣，由策劃到落實都得到各方好友鼎力襄助，佢除咗感謝政府全力協助外，仲多謝香港殯儀館蕭明家族後人蕭志成為場地布置鮮花，更要感謝多位喺現場出力嘅義工。
卓妮尋日去到追思會，見肥亨聯同太太Linda及大女馬露明一齊接待參加者，政商界、演藝界名人及市民紛紛到場，包括醫管局主席胡定旭、香港旅遊業議會總幹事董耀中、運輸及房屋局局長鄭汝樺（Eva）、民政事務局副局長許曉暉（Florence）、食物及衞生局副局長梁卓偉、立法會議員林健鋒（Jeffrey）及梁劉柔芬等，煲呔曾夫婦亦參加咗追思會，在場逗留一小時。大部分與會者神情哀傷，為死傷者祈禱和祝福之餘，亦希望大家舒解不安情緒。
Eva鄭：仿似神撥開雲雨
由於慘劇事出突然，肥亨話今次追思會只得兩日籌備，上周四早上開始策劃，落實方案後再向政府部門申請，好彩政府好幫手，當日下午已成功取得場地及集會批文，夜晚再急忙安排翌日喺報章刊登廣告，到前日（周五）就安排出席者名單及活動程序，好彩得各方好友幫忙。肥亨特別提到，今次請到殯儀業老行尊蕭志成幫手，以特惠價三千元幫手布置鮮花，令整個場地相當莊嚴。
話說尋日天氣悶熱，陰晴不定，但到追思會三點前一刻，突然雨過天青，灑雨後嘅場地變得乾淨及涼快好多。據聞Eva鄭亦嘖嘖稱奇，話好似神用手將雲同雨撥開一樣。尋日大部分參加者都話直擊事件後好唔安樂，好似Eva就話當晚睇直播時啱啱食緊飯，槍聲過後成家人好震驚，連飯都食唔落。Jeffrey就話睇完直播後成晚瞓唔着，希望菲國做好調查報告，以祭死者在天之靈。
董耀中就透露，佢好早從康泰方面獲悉事件，最初諗住好快解決，估唔到發生咁大件事，佢做旅遊業咁耐都未見過，呢幾晚都瞓得唔好。慘劇事發後，好多人都話唔會再去菲律賓，但好似肥亨愛女露明去傳教又點好呢？肥亨同露明異口同聲話，如果神要安排佢去菲國傳道及分享福音，相信神會祝福佢，唔使擔心喎！
卓妮