政情：出山玩「勁」選 嫻姐無閂後門

二○一二年立法會選舉，焦點肯定係由全港三百萬選民定勝負嘅五個「超級議席」，各黨積極備戰，矢言大舉進軍直選嘅工聯會又點會輕易放過？據悉，工聯會內部已展開猛烈游說攻勢，希望說服曾經為「票后」級人馬嘅嫻姐出山，幫工聯取下一席超級議席，以壯聲勢。但嫻姐自○八年淡出立法會後，一直深居簡出，佢到底點諗，外界不得而知，只可以估估吓。

突現身政府總部

嫻姐嘅參選啞謎，尋日自己拆解番。近兩年已絕迹施政報告諮詢會嘅嫻姐，突然現身政府總部，唔知佢係有嘢要同煲呔曾講，定係有訊息要畀記者知，總之心情靚靚，同記者有講有笑。嫻姐直言，工聯想搵一個受過直選洗禮嘅人，出戰超級區議會議席，工會內、地區上同身邊好友，都不停有人游說佢，有支持者仲說之以情，指以前想投票畀佢，但由於唔係九龍東選民，一直得個「想」字，超級區議會無選區限制，如果嫻姐參選就好嘞！

所謂「士為知己者死」，嫻姐如果想幫忠實「粉絲」圓夢，唔使要講生講死咁沉重，只要報名參選就可以。被記者連番追問係咪參選，雖然嫻姐話享受現時嘅工作，又話完全無諗過落場參選明年區議會，但係斬釘截鐵問佢係唔係唔會考慮參選，嫻姐卻選擇唔答，捉住一名女記者，話授權作答喎，態度相當扭擰，即係無封死後門。

還記得今年初公民黨同社民連策動「五區公投」前，中央未下達封殺指令，工聯會又係極力游說嫻姐出山，當時嫻姐態度相當明確，表明無乜意欲參選。面對超級區議會，嫻姐態度曖昧得多，模棱兩可，睇嚟工聯今次能成功說服嫻姐嘅機會，同「五區公投」一役不可同日而語。

嫻姐曾經係九龍東「票后」，○四同○八兩次立法會選戰，建制派喺九龍東配票，嫻姐部分選票被迫「過戶」民建聯陳鑑林，因而痛失「票后」之譽，呢啖冤屈氣，唔知嫻姐有冇打算透過參選超級區議會，一次過大吐烏氣呢？