政情：林健鋒讀錯舟曲賴iPad
呢排全國嘅焦點都放喺引致多人死傷嘅舟曲縣泥石流慘劇上，新聞日播夜播，關注時事嘅人都應該知係邊個縣發生災害。偏偏係經濟動力立法會議員林健鋒（Jeffrey），尋日竟然多次喺立法會會議上，將舟曲縣講成聽都未聽過嘅「丹曲」、甚至「曲丹」縣，事後仲賴話係iPad出啲字唔清楚，搞到跟稿讀嘅佢讀錯。
立法會尋日召開特別財委會通過撥款賑災，Jeffrey發言時，首先就話「丹曲」縣仍然有好多人失蹤，當一眾議員都笑唔切佢講錯地方名之時，佢再下一城，話「曲丹」縣災情緊急，好需要大家協助。將舟曲縣講成「丹曲」縣，勉強可以解釋話睇漏咗「舟」字嘅一點，但讀成「曲丹」真係好離譜，搞到連財委會主席劉慧卿都忍唔住狠狠咁寸佢：「林議員，『舟曲』係咪呀？咩『丹曲』呀？你講緊邊度呀？」Jeffrey最後停頓咗幾秒，先意會到讀錯字。
Jeffrey事後解釋，話讀錯係因為佢部iPad出嘅字唔清楚：「我唔係讀錯，係睇漏一點啫，你估我真係唔識讀咩？」其實大家唔係話佢讀錯字，只係質疑佢唔關心災情啫！