政情：謝志峰借林D9踩高官
近日突然被人議論紛紛嘅港台電視節目《城市論壇》原來已經播足三十年，主持人兼監製謝志峰尋日拉埋上司助理處長張文新出嚟，公布未來發展方向同宣傳三十周年慶祝活動。謝志峰做咗主持七年，遇過嘅嘉賓唔少，但可以令佢留下深刻印象嘅高官其實唔多，喺立法會不時畀議員鬧嘅政制及內地事務局局長林瑞麟，竟然都有抵讚嘅地方。
喺謝志峰口中，抵讚嘅仲有發展局局長林鄭月娥同埋已退休嘅前社會福利署署長余志穩。余志穩係好官相信唔使多講，林鄭就夠膽隻身踩入皇后碼頭同示威者對話，至於林D9，佢之前出席有關「五區公投」嘅論壇時雖然受到四面圍攻，但係仍然面無懼色，清楚咁闡述政府立場，謝志峰覺得兩位高官真係好有風範，比起嗰啲躊躇不前、三顧草廬，問明有幾多分鐘發言都請唔到嘅官員，真係好得多。
啊，原來係借兩位局長同一位前署長踩其他高官，明白晒！