政情：甘威晒iPhone4寸高達Out
早排iPhone4一出，即時風靡全球，連民主黨立法會議員甘乃威都唔執輸買咗部。甘威尋日喺立法會揸住部銀藍色、閃令令嘅電話，睇真啲原來係呢排勁流行嘅iPhone4，佢好得戚咁話，香港第一日推出行貨時，佢搶先買咗，仲有份參加電訊商喺山頂舉行嘅派對，派對有嘢食有嘢玩、仲有明星睇添。
甘威之前一直用iPhone3，換機後賣咗部機套現兩千蚊，佢知道iPhone4依家有價有市，聽講賣上深圳可以值成萬蚊喎。至於佢用緊嘅機殼就來自深圳，盛惠三十蚊，上面仲貼住囡囡送嘅「Don't Touch」貼紙添，莫非想日日提醒佢咪手多多？
甘威愈講愈風騷，寸埋民主黨資訊科技及廣播政策嘅副發言人李永達，話高達要黨友不斷叫先肯買智能電話，佢有資格取而代之。講開未來嘅超級區議會議席選舉，唔少政圈中人都話有興趣，做過多屆區議員嘅甘威就話，依家講參選超級區會係嘥氣，首要係贏到區議會議席先，仲話區議會唔係靠選舉工程，因為「猛虎不及地頭蟲」喎。