政情：孫公帶中學生遊世博

行特別通道免排隊

孫太尋日話，上海依家仲係好熱，最高有成攝氏四十度，真係曬到人都溶。好彩呢幾日啱啱落咗幾陣雨，天氣先無咁熱，不過，幾熱都唔會影響佢哋參觀世博嘅熱情。世博會主辦單位仲好有心，尋日特登提早個半鐘開園，又安排特別通道畀孫公、孫太同香港學生入園參觀，等大家唔使排隊排到天黑，可以睇多幾個館。孫公一行人就好順利咁參觀咗中國館、香港館、日本館等。

除咗啲新科技展品令大家嘆為觀止外，孫太仲話，香港學生嘅表現都令佢眼前一亮。事關咁大批學生一齊出現，佢哋不單止無嘈無亂，仲好乖添，去到邊都好有秩序，完全無失禮香港，真係值得一讚。佢哋尋晚仲一齊食飯，大家交流下今次世博會嘅見聞。