政情：鄭耀棠倡合併選區搵着數

九東併九西 離島歸港島

棠哥建議，一二年將九龍東、西合併做一個大區，另外將新界西嘅離島區撥歸港島，其餘劃界不變。依呢個比例，港島區將佔七席，九龍區十席，新界東、西各九席。棠哥話，咁分法可以縮小各區議席數目嘅差距，當選議員所得「票值」又比較接近，仲可以令細政黨及獨立人士有更大嘅參選空間，好似好處一籮籮咁。

如果真係咁好，點解之前冇人提出呢？唔通個個都冇棠哥嘅慧眼？非也，呢個建議完全為工聯會度身訂造，如果成事，佢哋先係最大贏家。工聯會依家淨係可以喺新西同九東各爭一席，想爭多一席都冇位可以攝。新東嘅票畀泛民分到盡，想喺九西出選又未必同其他建制派協調到，要喺中產為主嘅港島區跑出就更加困難，所以如果劃區不變，工聯會嘅地區直選席位都唔會有好多進帳。

不過依照棠哥嘅分法，工聯會就好大機會攞足五席做大贏家。首先，東涌有唔少屋邨，人口多之餘，大部分係基層市民，加上現任議員王國興喺東涌落咗唔少工夫，如果離島區撥入港島，分分鐘工聯會可以派人喺港島鍊贏一席。

九東一向係工聯會票倉，上屆工聯會骨幹陳婉嫻同黃國健拎咗五萬幾票，加埋九西嘅人口，唔使再攞太多票數，穩奪兩席不難。新東同新西都係基層市民眾多，王國興已喺新西殺出血路，若下屆不再幫人抬轎，一直幫打工仔發聲嘅工聯會要喺新東攞一席，亦應該沒問題。加加埋埋，唔使投資好多，議席都可以翻兩番，難怪棠哥明知畀人篤爆都要講出聲啦！只不過棠哥嘅建議其他政團受唔受，就要睇過至知嘞！