中環耳目：張宇人為飽口福破食戒
立法會飲食界代表張宇人（Tommy）天生為食，減肥期間依然每日雪糕不離口。前晚某五星酒店舉行御廚晚宴，Tommy帶埋太太一齊嚟食好嘢，見到高膽固醇嘅鵪鶉蛋同燒肉，破戒都要食兩件。
狼吞鵪鶉蛋燒肉
晚宴開始前有個酒會，大會安排小食招呼賓客，其中一款係用匙羹裝住鵪鶉蛋，賣相精緻，由侍應端到客人面前，Tommy睇見流晒口水，二話不說攞起隻蛋放入口。點知呢頭食完蛋，嗰頭又有侍應捧嚟新鮮燒肉，Tommy唔理咁多，再整多一件。
食得咁放，唔怕肥咩？Tommy拍拍肚皮話，體重維持一百七十磅，好fit。佢又自爆近日還緊「飯債」，輪流請朋友食飯，事關立法會休會前會議開唔停，應承朋友食飯都兌現唔到，趁暑假唔使開會，頻頻約人食飯，前日下晝設宴慰勞幫咗佢廿一年嘅助手，Tommy叫助手任揀一支香檳當禮物，可惜咁啱佢食緊中藥，無福消受喎。