中環出更：楊釗搞論壇洗滌人心
宗教有助洗滌人心，前日「牛仔褲大王」、旭日集團董事長楊釗同前理大校長潘宗光，一齊以中華佛教文化院會長身份，出席下月九至十日舉行嘅「首屆中華佛教宗風論壇」記者會。近年社會怨氣日重，仇富心理嚴重，有錢人亦不見得一定快樂，學佛近三十年嘅楊釗出錢出力搞今次論壇，希望透過佛家智慧令大家反思人生意義。
今次論壇請來兩岸四地多位具代表性嘅高僧方丈參加，好似中國佛教八大祖庭、禪宗六大祖庭、中國四大菩薩名山，以及台灣、香港各佛山名寺嘅高僧方丈，連中國八大長老都答應出席，包括從未參加過類似盛會嘅夢參長老，可見楊釗牙力非凡！
心靈物質 各設「戶口」
每次見楊釗，卓妮都會聽佢講佛偈。佢話自己擁有兩個戶口，一個用來積存名、利同社會地位，另一個就係用來儲存家庭、健康同快樂，因此心靈同物質都同樣豐富，可惜呢兩個戶口無得兌換，佢希望大家追求物質嘅同時，千祈唔好忽略為心靈戶口存款。
眼見時下嘅仇富心態，佢寄語大家見到比自己強嘅人，唔好妒忌，應用隨喜嘅心去對待，欣賞別人成功之處；相反，對條件無自己咁好嘅人，唔好討厭，應盡力幫助對方。