中環出更：兄弟相似莊家彬被點錯相
名人二、三代近期頻頻傳出負面新聞，但部分人卻係無辜被牽連，好似立法會議員霍震霆長子霍啟剛，早前就畀人屈佢嗒糖女主播，實情嗒糖嘅另有其人。點知呢幾日有單仲搞到點錯相，誤指莊士集團太子爺莊家彬（Albert）去蘭桂坊參加校服派對，實情參加派對係Albert嘅細佬莊家豐（Edwin），兩兄弟年紀相差五年，但樣貌似足孖生兄弟。
呼冤無去校服派對
早前有報道圖文並茂話Albert去蘭桂坊一間酒吧參加校服派對，咁啱前日（十八日）菁英會班兄弟上京開新一屆全國青聯會議前，坐埋碰吓頭，睇吓上京時有咩要留意，咁啱畀卓妮撞正。一見菁英會副主席Albert，當然要問個究竟啦！Albert呼冤話無去參加派對，聲言依家已好少去蘭桂坊蒲吧，專注幫爸爸打理公司地產生意，反而蒲樓盤就多，蒲吧嘅其實係佢細佬Edwin莊家豐。
Albert話，Edwin愈大同佢長得愈似樣，好多人都將佢兩兄弟搞錯：「有次有個uncle同我細佬講嘢，原來一直當咗細佬係我！」佢同細佬仲經常收到朋友來電，無端端畀人鬧一餐，話同佢打招呼無反應，原來係佢嘅朋友將細佬當係佢，佢細佬朋友又當佢係佢細佬。不過，Albert無為今次被人點錯相一事怪責Edwin，反而為細佬講好話，話佢喺外國讀書，習染西方文化，放暑假返港去蘭桂坊蒲吧好正常。Albert仲話：「我以前去外國讀書，放暑假返香港都係咁啦，見吓朋友飲杯酒有乜咁出奇呢？」
Edwin今年已經廿五歲，目前喺美國最大嘅藝術及設計學校之一、紐約帕森設計學院（Parsons School of Design）修讀建築及室內設計，已經讀咗五年，明年畢業。Albert話，Edwin回港實習期間自行開設公司做生意，接過多宗外國室內設計工程。
Albert下周初將啟程到北京，參加第十一屆全國青聯會議，屆時會選出新一屆正、副主席及常委，唔知佢會唔會更上層樓呢？
卓妮