政情：立會休會 低調還神
立法會依家仲放緊暑假休緊會，照道理立法會應該水盡鵝飛，不過尋日下晝兩點幾，就有人睇到廿幾個立法會秘書處職員同保安部同事，喺立法會秘書長吳文華（Pauline）同法律顧問馬耀添（Jimmy）帶領下，喺立法會大樓露台切燒豬拜神。但七夕已過、鬼節未到，到底佢哋拜乜嘢呢？一問之下，原來呢個係立法會集體回憶，只係一直冇畀人發現，睇嚟遲啲立法會搬去添馬艦，都要先搵定個拜神靚位嘞！
知情人士同我哋講，立法會休會後還神係多年慣例。聞說某年秘書處好多人有病痛，甚至有同事無故受傷，有人提議不如拜吓神啦。之後大家嘅病痛有無好番就無從考究，但自此秘書處每到休會就會揀個吉時吉日還神。
立法會上個會期經歷高鐵撥款同政改表決兩項超具爭議性議題，全體職員都陷入精神緊張，保安部仲有幾個職員受傷，最後順利過渡，的確還得神落。我哋睇過通勝，尋日係宜祭祀祈福，下晝一點至三點仲最適合酬神，睇嚟Pauline為咗還神，花咗唔少心思。