政情：何鍾泰連任態度開放
數立法會最資深議員，工程界代表何鍾泰必然佔一席位。何鍾泰自臨立會年代已開始做議員，回歸後更一直冧莊，做足四屆冇抖過；依家人人講新舊交替，培養新人，唔少人都想知何鍾泰幾時搵人接棒。早前喺個場合撞到何鍾泰，問佢下屆仲會唔會尋求連任，佢依然支支吾吾，仲大呻打鑼都仲未搵到接班人！
何鍾泰早前出席美國萬通小太空人計劃活動，望住一班年紀輕輕已對答如流嘅小朋友，佢不禁有所感觸，話呢個計劃十二年前開始搞，佢仲由第一屆評審做到依家，依家年輕一代好醒目，要喺幾千位報名者挑選六位出嚟，真係令佢好頭痛。
做評審做得咁長情，咁做立法會議員係咪一樣先？何鍾泰堅稱自己連續十四年冇放假，上屆已經想退落嚟，可惜搵唔到人接班。佢仲話已打晒鑼搵歷任嘅工程師學會會長幫手搵人。如果又搵唔到，點辦呢？佢話對連任持開放態度喎。咁講法，佢都係準備廿年都「冇假放」囉。