政情：譚燕玉許誠毅獲《福布斯》殊榮
香港人有創意、有才華，去到邊度發展都無有怕。美國《福布斯》雜誌啱啱選出「廿五位美籍華人商界翹楚」，有四個香港人入圍，包括兩個理大校友、著名時裝設計師譚燕玉（Vivienne Tam）同電影《史力加III》導演許誠毅，仲有華美銀行董事長吳建民及軟件公司Sybase主席John Chen，真係可喜可賀！
李安楊致遠亦曾得獎
呢個殊榮喺○八年首次公布時，吳建民同John Chen已經率先入圍，其他得獎人仲包括著名導演李安同雅虎網站創辦人楊致遠，個個都大有來頭，認真巴閉。今次譚燕玉同許誠毅齊齊入選，可以話係對佢哋嘅肯定，理大與有榮焉。
譚燕玉一九七八年喺理大前身、理工學院設計學課程畢業，攞到高級文憑，之後去咗紐約開展時裝事業，九四年更加創立自己名字嘅品牌。許誠毅就係理工學院八四年平面設計課程嘅畢業生，八九年去咗荷里活打江山，係《史力加I》嘅動畫總監，之後仲做埋《史力加III》嘅聯合導演，今次獲《福布斯》頒發殊榮，難得連理大都出稿告諸天下。