政情：民協博翻身搞殯儀

民協早喺年幾前開咗間樓上按摩院，安排按摩員到私人住宅會所提供按摩服務，可惜反應一般，今個月終於因為止唔到血被迫結業。聽民協中人講，原來開檔幫人按肩頸同腳都唔使攞牌，不過做全身按摩就要，民協因為冇呢方面經驗，唔知做埋全身按摩嘅生意額係會差咁遠，因而冇攞到牌，最後搞到觸礁，蝕本收場。

坦言門外漢　靠「行家」幫手

按摩生意做唔嚟，民協並冇放棄，仲忽發奇想轉搞殯儀服務。民協中人話，該黨喺地區經常遇到一啲受制於中國傳統思想嘅老人家，因為唔想喺生前計劃身後事，最後搞到臨終都要畀人趁機掠一筆，一啲無親無故嘅老人家就更為慘情，所以希望做番啲嘢，幫班長者提供一條龍兼價錢更相宜嘅殯儀服務喎。佢哋仲揚言乜儀式乜宗教都搞得，連依家外國好流行嘅「開心殯儀」都諗得過，希望可以歡歡樂樂、體體面面咁送老人家最後一程，但就坦言大家都係殯儀業嘅門外漢，都要靠一啲善心嘅「行家」幫幫手先成事。

雖然民協早前就政改問題有份同中央談判，可惜鎂光燈一直只射喺白鴿黨度；政改通過後，政圈更一度傳出民協會同白鴿黨合併。其實民協予人嘅感覺都係比較老餅，比其他政黨較少新猷、新血，話唔定佢哋喺地區搞呢啲咁「潮」嘅「開心殯儀」，幫到班地區長者之餘，更可以幫民協殺出一條新血路都未定！