中環出更：盧文端摩納哥食賭場閉門羹
「福建幫」頭領、全國政協委員盧文端每逢長假期，佢都會「一拖四」帶太太、細女Amanda、外父同外母去旅行，今年農曆新年時去新加坡玩咗一星期，氹到外父好開心。上月暑假一開始，盧文端又豪花幾十萬元，帶隊去歐洲玩十八日，全程頭等機票，期間仲參加咗十四日地中海郵輪假期，旅程一直都好暢順，點知到訪摩納哥蒙地卡羅一個賭場時，竟然食閉門羹。
盧文端一家喺英國上船，分別到直布羅陀、葡萄牙里斯本、西班牙巴塞隆拿及天才畫家畢加索故鄉馬拉加、摩納哥蒙地卡羅、法國康城及尼斯等城市，最後返回英國靠岸。
短褲涼鞋Look唔啱要求
盧文端最深刻係去到蒙地卡羅賭場時，兌換咗三千美元諗住入場碰吓運氣，點知賭場要客人遵守衣着規格，好似佢哋一身短衫、短褲、涼鞋嘅旅遊Look，就被拒絕進場，惟有改道到附近地方行吓。
地中海郵輪假期都有好多唔同行程，大部分盧文端都去過，但佢話今次呢程比較辛苦，要着波鞋行吓山路，欣賞小鎮風情，睇嘅嘢與大城市截然不同。至於郵輪上用餐，盧文端話啲西班牙菜都可以接受，好似海鮮飯以地道製法，啲飯半生熟較硬身，海鮮就好新鮮。問佢同香港嘅海鮮飯邊度好食啲，盧文端話各有各好食！