中環出更：一庭一邦順利接班拍住上
近排唔少工商界第二代陸續接班，以建築工程起家嘅上市公司俊和發展集團，四個月前亦正式由彭氏兩兄弟揸旗。
新任主席彭一庭（Dominic）同埋出任副主席嘅細佬彭一邦，兩人都仲未夠四十歲，尋日以兄弟檔姿態出席股東大會，為已經有四十幾年歷史嘅俊和注入一股新活力。
性格明顯比細佬活潑嘅Dominic話，佢返公司幫手已經六、七年，接班後一切都好順利；不過佢話公司業務遍布中、港、阿聯酋同東南亞，項目又多，長遠嚟講需要繼續強化管理團隊。
Dominic依家同細佬各自互有分工，細佬負責老本行嘅建築業務，而佢就負責地產發展業務，一靜一動，都幾切合兩兄弟嘅性格。
卓妮見佢哋尋日主持股東大會時信心十足，對答如流，同老臣子嘅互動都好融洽，相信股東放晒心啦！