中環出更：梁愛詩再出擊血拼Christofle
純淨清雅嘅銀器，魔力難以抗拒，更何況係象徵尊貴與高雅嘅法國殿堂級銀器品牌Christofle，連基本法委員會副主任梁愛詩都忍唔住一買再買。詩姐個幾月前買咗個Christofle吊墜，話咁快又心思思想入貨，月初再度出擊，「血拼」Christofle。
銀器魅力沒發擋，Christofle出品向來有「國王的銀器」之美譽，矜貴程度可想而知。詩姐芳心亦畀Christofle俘虜，八月初一個星期四下午五點半，卓妮喺中環太子大廈一樓嘅Christofle撞見佢，同一地點，卓妮月前已撞過一次，今次又撞到，真係蹺！呢日詩姐又係單拖行街，一身高雅旗袍打扮，拎住個米白色手袋，似乎係啱啱收工。
卓妮見到詩姐嗰陣，佢已睇中一件銀器擺設，摷銀包準備畀錢，當等待店員包禮物期間，詩姐又心思思行近首飾櫃，打雀咁眼望住閃耀生輝嘅首飾。
新款手鈪 立即試戴
Christofle嘅純銀首飾融合時尚、瑰麗於一身，每件銀器都充滿着迷人氣質，詩姐側起頭逐件細心欣賞，不自覺露出陶醉笑容。睇咗無耐，果然畀佢發現一隻設計精緻嘅新款手鈪，急不及待試上手睇真啲。隻鈪睇嚟幾隆重，襯晚裝一流，但返工戴就未必啱嘞，詩姐最後決定唔買，轉身接過店員包好嘅貨品，笑容滿面地離開。詩姐去親Christofle都有幫襯，睇怕舖頭可以考慮搵佢做代言人噃！
卓妮