袋巾傑分析，當年參選特首，係為帶出「有得睇、冇得揀」嘅訊息，等市民明白制度嘅不公義；依家好多市民都了解呢個弊病，冇理由下屆再去為抬轎而參選。袋巾傑仲話，大家都明白泛民完全冇贏面，不如用嚟做籌碼；如果最後有兩個建制派出嚟選，雙方都為咗高票當選，泛民嗰百幾票就好重要，到時可要求參選者承諾有多啲民主及民生政策。即使到時得一個人出嚟選，泛民唔參選，更加可彰顯制度不公，仲話到時引起嘅回響仲大喎。
白鴿黨早前放風話唔再撐袋巾傑選特首，言猶在耳，袋巾傑尋日突然轉口風話一二年可能唔選，莫非佢怕無咗白鴿黨支持，到時攞唔夠一百五十個選委提名換入場券？