政情：兩政助上立會零發言
政府好快就會公布副局長同政治助理嘅薪酬評核中期報告，好多民間團體其實都同時為呢班官員做評核，其中一個係新力量網絡。研究員方志恒尋日喺電台節目提出一項驚人嘅統計，原來咁多個政治助理喺過去兩年加加埋埋都只係出席咗立法會大小會議三十五次，最少嘅民政事務局政助徐英偉同財經事務及庫務局政助伍潔鏇竟然只係出席咗兩次立法會會議，真係咪話唔得人驚。
最勤力出席嘅政助係環境局嘅蔡少綿，一共出席咗八次會議，至於徐英偉同伍潔鏇除咗出席會議少之外，發言次數同樣唔見得人，同樣錄得「零」次嘅成績。副局長方面，最勤力去立法會開會嘅係食物及衞生局副局長梁卓偉，除咗出席咗四十次會議之外，發言次數仲錄得四百一十九次嘅高紀錄，比第二位嘅環境局副局長潘潔足足多出一倍。
方志恒分析，官員勤力出席立法會會議，對自己嘅民望同公信力都有正面幫助，唔知班副局政助又聽唔聽得入耳呢？