政情：莊偉茵俄國「桑拿」減肥
近期嘅俄羅斯特大山火，造成首都莫斯科近百年來最嚴重嘅空氣污染，有國家甚至發出旅遊警告，呼籲國民勿去當地旅行。國泰航空企業事務董事莊偉茵喺自己公司旗下刊物《國泰天地》寫咗篇遊記，透露早前與十幾個朋友組團去當地旅行，玩足十日，好彩喺山火發生前已返咗香港。佢對今次俄羅斯之旅十分滿意，美中不足係，佢遇上當地一百三十年以來最酷熱嘅夏天，氣溫屢創新高，加上無遮無擋，所以佢被迫不斷搽防曬膏。
雖然做足預防措施，佢隻玉手仍然曬到皮膚敏感，仲要日日食雪糕解暑。好彩天氣酷熱流汗多，體重不增反減，連莊偉茵都話賺晒！
除咗遊莫斯科，莊偉茵此行仲去過聖彼得堡。佢話當地天空好藍，令人好舒服；地鐵站仲好乾淨整齊，甚至比英國更好，每一個站都好有特色，可惜時間有限，佢只去咗四個站咁多。莊偉茵仲大讚當地食物豐儉由人，每餐由港幣百幾蚊到過百蚊美金都有，點食都得！