政情：楊孫西組聯盟振興本港茶業
國際茶展、美食博覽及中醫藥展尋日喺灣仔會展開鑼，美食博覽大收旺場外，茶展都逼滿一班品茶愛好者，當中包括身為搞手嘅福建幫頭領、全國政協常委楊孫西同埋主禮嘉賓立法會議員李華明，同場仲有原全國政協副主席李蒙，大家一邊品茶一邊講茶經。近年致力推廣茗茶文化嘅楊孫西計劃籌組一個「世界茶葉產銷聯盟」，希望搞起香港茶「葉（業）」。
楊孫西旗下武夷山香江茶業出產嘅頂級野生「大紅袍」享譽盛名，做得呢行肯定對茶葉認識非淺。原來佢自幼喺鄉下已跟長輩學飲茶，主要飲烏龍茶、鐵觀音、老松水仙等，來港後轉飲普洱、龍井，近年就迷上「大紅袍」。楊孫西話，香港每年人均茶葉消耗量更為亞洲之冠，港人飲茶文化夠獨特有創意，識得將紅茶用嚟沖港式奶茶，喺香港仲可以搵到幾十年嘅陳年普洱茶餅！
由於現時國內好多茶葉都經香港運到世界各地，亦有好多外國人來港搵靚茶葉，楊孫西計劃籌組「世界茶葉產銷聯盟」，以香港獨特嘅飲茶文化、豐富銷售經驗及完善知識產權法例，佢相信可令茶展做得更國際化和更具代表性，只要集結官方、業界及組織等多方力量，佢相信定能搞好中國及香港茶業，提高茶葉產值。
肥仔明推介半發酵鐵觀音
「肥仔明」李華明都係識茶之人，平時最鍾意飲鐵觀音，日日飲，即使外出工作都會帶定茶包。肥仔明教路，買鐵觀音要買半發酵嘅，全發酵會有異味，仲話要貴價貨先至好飲。咁佢飲嘅鐵觀音有幾貴呢？肥仔明竟然話唔知，因為係太太買喎，真係食米唔知價！
茶展明日會舉行「國際金茶王大賽2010」，七個賽區包括香港、深圳、北京、上海、澳門、澳洲及加拿大代表比併沖港式奶茶，爭奪國際金茶王殊榮。