政情：80後如計時彈 羅太加入撲火隊

「八十後」元旦衝擊中聯辦、高鐵一役圍堵立法會大樓等連串事件後，有分析認為，「八十後」問題死結一日不解，遲早危及港府管治以至建制派選情，勢必將社會推向激進邊緣，但今年上半年政改大戰如火如荼，問題一直擱置。現時政改爭拗塵埃落定，要拆解「八十後」呢個計時彈，已係事在必行，問題只係招數屬硬屬軟，從羅太尋日嘅姿態同語調睇嚟，軟攻似乎更易為後生仔受落。

羅太離開官場時任廉政專員，但主事教育嗰八年，先至係佢嘅官場代表作。卸下烏紗嘅羅太，近年關注貧窮問題，尋日同青協學生講最低工資，講生果金，講推動基建，但最惹人關注嘅，始終都係政治問題，尤其羅太現時身為人大，分量零舍唔同。

勸溫和對話 撐功能組別

被同學仔問到，點睇直選議員成日為競選亂開選舉支票嘅隱憂，羅太指香港好大程度上已擁有民主，民主唔一定要普選，但香港官員無受過直選洗禮，所以功能組別有存在價值，對直選議員可起制衡作用。羅太仲話，希望中央畀香港政黨發展得健康啲，好似推行政黨法咁，確立政黨地位，增加政黨運作透明度，政黨就可更理性發展。

羅太話鋒一轉，指若然香港年輕人可以溫和同有建設性嘅方式，參與香港事務，香港嘅民主步伐就會行得更快；佢話，千祈唔好畀中央覺得香港係一個管治唔到嘅地方。羅太呢番話簡直係整個活動嘅點睛所在。

講座結束，羅太對有記者在場大表驚訝，強調個人欣賞「八十後」喺高鐵一役「行幾步跪一跪」嘅示威方式，做教育嘅，無非想學生有獨立思考，肯參與社會事務啫，最緊要政府設立多啲渠道，畀年輕人發聲，溝通多啲，咁就無問題㗎嘞！