政情：轟觀景台惡霸田少慢半拍

司徒拔道俗稱觀景台嘅瞭望處長期被人非法霸佔經營遊客影相生意，爆出遊客被謾罵嘅旅遊界醜聞，片段前日由電視台播出街。事件曝咗光一日，旅發局主席田北俊尋日拿拿臨發新聞稿回應，發炮狠批不法分子破壞香港旅業形象，促請政府執法，阻止同類事件發生。田少做旅發局主席一向上心，尤其依家自由黨部署重奪立法會旅遊界議席，佢更加瞓身。田少尋日出稿，點計都慢咗一日，回響減低，但遲到總好過無到！