政情：甘威帶團遊立會 服未！
平時唔少議員會搞吓蛇宴、荔枝團同選民、街坊打成一片，不過將返工地方變成景點都算係少數。民主黨立法會議員甘乃威準備搞一個「立法會大樓觀賞團」，食住立法會就快搬嘅噱頭作為招徠，真係唔寫個服字畀佢都唔得。
最近甘威喺佢嘅網誌上作出召集，由佢親自帶隊嘅觀賞團，將於今個月十九日舉行，賣點正正就係佢經常出入嘅立法會大樓。甘威喺網誌嘅介紹話，由於位處添馬艦嘅立法會新大樓將會喺明年年底啟用，呼籲市民把握最後機會，參觀有近百年歷史、中西合璧嘅立法會大樓，佢仲話參加呢個團可以感受一下置身立法會會議廳同宴會廳嘅滋味，兼且可以盡情影相。
其實特區政府不妨參考一下，整番個「美利大廈觀賞團」或者「政府總部觀賞團」，甚至係「特首辦觀賞團」，總之人人都做導賞員，反正呢啲地方遲啲都會搬去新總部「門常開」，搞番個團拉攏市民，話唔定有助提升特區政府嘅民望呢！