政情：邱副博出位隨時受靶
一班副局政助就嚟派成績表，雖然大家都覺得港府會一致凍薪，不過風頭火勢，個個都趕住爭表現，其中運輸及房屋局副局長邱誠武就會喺月尾出席青年交流會，同一班青少年討論資助市民自置居所問題，彰顯自己有做嘢。同年輕人溝通固然係好事，但房屋問題熱烘烘，社會怨氣甚深，邱副去到隨時觸及計時炸彈，變咗自動獻身受靶喎！
自高鐵一役後，政府成日想同「八十後」溝通，青年事務委員會唔敢怠慢，嚟緊會舉辦一系列青年交流會，請高官出席，邱副一向「深閨」，佢肯接受邀請，都算難得囉。
不過，邱副上任以嚟，因為「溝通不良」，引起唔少政治風波。好似○八年邱副因唔覆的士司機「大佬」電話，釀成一場的士堵塞交通風波。早前邱副同菜園村村民及「新界王」劉皇發開三方會議前又臨時「甩底」兼自稱「聽唔到」電話，被村民狠批擺官威，搞到要局長鄭汝樺介入。希望今次邱副同青年嘅溝通暢順，唔會再搞出乜嘢風波啦！