政情：南區補選火藥味濃
南區補選揭開戰幔，點知兩名候選人公民黨司馬文同匯賢智庫劉應東首次碰頭已充滿火藥味。司馬文尋日公開暗寸劉應東有匯賢智庫撐腰，質疑佢唔係獨立候選人。力撐劉應東嘅葉劉淑儀即時反擊，話選民鍾意做實事嘅人，批評對方言論太針對性。雖然今次只係區會補選，但雙方嘅槍來劍往就夠晒精彩！
南區區會補選尋日舉行簡介會，兩名候選人首次正面交鋒。司馬文喺會上問選管會主席馮驊「獨立候選人」嘅定義，顯然衝着強調唔係政黨但又積極參政嘅匯賢而嚟。馮驊就話，「獨立」即係冇政黨背景嘅意思。司馬文咬住唔放再追問，馮驊就輕描淡寫講咗句：「It's generally understood（這是大家都很明白的）。」變相為劉解圍。
有份撐場嘅葉劉被寸當然唔多高興，佢話匯賢既唔係政黨，劉亦只係義工，唔明有咩咁唔「獨立」。佢又批評司馬文未開波就成日發表針對性言論。點知話口未完，劉應東又寸番司馬文，話佢可能因為比較老，喺街上拉票時都比佢早收工喎，似乎互不相讓，睇嚟好戲仍在後頭！