政情：潘佩璆谷知名度救直選

一二年立法會選舉波譎雲詭，建制派昔日大票倉工聯會，近日矢言全面搶灘直選，唔再為人抬轎，選情勢必進一步白熱化。按工聯初步部署，黃國健留守九龍東；走基層路線殺出血路嘅王國興同葉偉明，分別會再戰新界西及由勞工界轉戰新界東，大局底定。至於落戶港島開議員辦事處嘅潘佩璆，則前路未明，事關潘醫生治療人心了得，但籠絡人心就唔多在行，一直未能打響知名度。早前工聯就有消息傳出，喺選票大過天嘅政治形勢下，潘佩璆轉戰港島嘅行情，已愈嚟愈被看淡。

承認以前太低調

下月就「升呢」做阿爺嘅潘佩璆，尋日強調自己出戰港島未斷纜，指自己仔大女大，經濟再無後顧之憂，自己嘅性格亦啱做講求利益平衡嘅政治工作，未來兩年會盡地一煲，催谷人氣博一鋪。不過，提起近期最熱嘅八達通出售顧客資料圖利風波，大家只會記得王國興；講最低工資咩，就諗起葉偉明；潘佩璆用乜嘢殺出重圍呢？佢嘅答案係：老本行。即係精神科專業服務。

近年香港接連發生精神病患者傷人事件，引起社會關注，好似前日竹園南邨就發生疑有精神問題嘅女子殺母後跳樓自盡悲劇，但傳媒無人諗起請教本身係聯合醫院精神科顧問醫生嘅潘佩璆，潘醫生自己都承認以前太「低調」，以後會高調番啲，一發生同類事件，會主動開記者會回應，幫到自己幫到人，佢話至少可以幫到要裙拉褲甩搵專家回應嘅電子傳媒先啦。

醫管局嘅醫生分四級制，顧問醫生最高級，比「怪醫」梁家騮嘅高級醫生職位仲高一級，潘佩璆依家先諗到將一己之長用喺選戰，遲就係遲咗啲，大家又睇吓佢可唔可以妙手回春，救得番自己嘅政治生命啦！