中環耳目：「廠佬」推介群記清湯腩
最近係上市公司公布業績嘅旺季，中環隨時可見城中名人富豪出入酒店會議室，自稱「廠佬」嘅偉易達主席黃子欣（Allan）都啱啱交出咗份靚靚嘅成績表。貴為《福布斯》富豪嘅佢，至愛嘅食肆竟然集中喺大埔，仲同卓妮極力推介近年備受食客追捧嘅群記清湯腩，勁讚質素頂呱呱！
Allan住喺港島半山區，每逢假期多數食住家飯，難怪佢話對港島嘅食肆唔係好熟悉。不過佢嘅辦公室喺大埔汀角路嘅太平工業中心，多年來一直喺大埔搵食，反而對大埔美食如數家珍。
講到大埔嘅醫肚蒲點，佢首推大埔墟大明里嘅群記，必食之選係佢哋嘅招牌清湯牛腩河。提起大埔尋食記，Allan愈講愈投入，盛讚大美督仲有好好味嘅泰國菜同埋意大利菜添！
開業八年嘅群記近年迅速崛起，雖然店面外觀毫不起眼，入邊亦僅容納幾張枱，但唔少明星名人都不惜長途跋涉入大埔，只求一試呢碗人人食完皆讚嘅清湯腩。佢哋嘅牛腩燉煮獨步一方，一碗鬆軟味美嘅清湯牛腩河盛惠廿七蚊。群記營業時間唔長，只係由下午一時開到晚上八時，周日休息，有時賣晒就即時收舖添。有心搵食嘅老饕留意啦！
