中環出更：阿Paul白姐姐睇戲當飯食
立法會議員謝偉俊（Paul）與女友白韻琹近日被指財困，要大屋搬細屋。白姐姐懶理傳聞，繼續遊山玩水。前日參觀上海世博返港，一落機就直踩戲院，仲連睇三場電影。阿Paul笑言，最高紀錄試過一日睇六場，睇三套，好濕碎咋！
白姐姐同阿Paul有影皆雙，前晚七點幾，兩人拍拖行金鐘太古廣場嘅Great Food Hall。阿Paul口味好西化，一嚟就揀乳酪，最後揀咗蜜桃味乳酪。白姐姐就行去揀麵包，唔知係咪嫌口寡寡，都係冇買，兜番轉頭會合阿Paul走去冰櫃前，攞起一杯Haagen Dazs朱古力味雪糕。
卓妮好奇上前問：「雪糕加乳酪就當晚餐？」白姐姐發現卓妮喺旁邊，哈哈大笑話：「係呀，我哋趕住入場睇《茱麗葉愛情信箱》，買乳酪同雪糕當晚餐囉。」原來兩人已睇完五點幾嗰場《魔法師的門徒》，打算食啲嘢再睇埋七點幾開場嘅《茱麗葉愛情信箱》，再直落睇埋十點鐘嘅《唐山大地震》，即係一日睇足三場！
三場？唔攰咩？白姐姐笑謂：「一次睇幾場戲嘅習慣，已維持十幾年。」佢話，幾年前應邵逸夫邀請，喺其私人戲院試過一口氣睇六套戲。
何解戲癮咁大？白姐姐同卓妮娓娓道來，話睇戲有助增廣見聞：「人哋用幾億元拍一套戲，你用兩個鐘就睇晒，你話幾抵!」
鍾意睇愛情戲
總結前晚三套戲，咁最愛係邊套呢？白姐姐投咗《茱麗葉愛情信箱》一票。佢尋日同卓妮話：「片中女主角七十歲仍然再婚，令我對愛情重燃希望；即使將來阿Paul唔要我，我都唔係賣剩蔗囉。」白姐姐就係白姐姐，永遠地語出驚人，你估佢唔到！至於阿Paul，都係話鍾意《茱》片:「套戲情感細膩、含蓄，我鍾意點到即止嘅戲；《唐山大地震》都好睇，不過太淒慘囉。」兩口子口味咁一致，果然係天生一對。
卓妮