八達通出售客戶個人資料同私隱圖利，市民除鬧爆八達通同港鐵管理層之外，亦都希望可以加強保障私隱，啱啱上任嘅個人資料私隱專員蔣任宏喺郵政署署長任內爆出侵犯私隱嘅往績，上任以來惡評如潮，尋日香港人權監察總幹事羅沃啟更提議，香港應立法訂定私隱專員所需嘅質素同挑選嘅程序，唔知係咪暗寸緊蔣任宏呢？
羅沃啟尋日上電台談保護人權，但全程不提蔣任宏。佢除咗支持擴大私隱專員公署權力外，仲話本港挑選保護人權架構嘅負責人時，應該以聯合國訂立嘅《巴黎原則》為基礎，人選要符合「背景、往績、質素」三大標準，仲話背景同往績可令有關人選有相當意識同警覺性，甚至有知識同經驗確保機構真正捍衞人權價值，所以佢倡議「將私隱專員所需的質素，以及為保障日後專員能夠充分獨立而設計的挑選架構和程序，都應列入法例之中。」
咁蔣任宏是否符合上述三個標準呢？蔣喺郵政署署長任內，發生郵局用攝錄機監察員工工作，呢件負面往績夠經典囉！至於背景，蔣任宏係退休高官，今次加入監察機構，退休高官俱樂部多佢一員。最後到個人質素，呢樣睇怕要政府出嚟交代至得。唔知呢啲係咪羅沃啟嘅弦外之音呢？