政情：蔡加讚自認《反斗》fans
電影《反斗奇兵３》故事輕鬆活潑而充滿溫情，結局又帶點哀傷，令一眾反斗fans大為滿足，原來玩具大王蔡志明愛兒蔡加讚都係《反斗》fans，為呢齣戲已經苦等十一年，童心未泯。
加讚話，佢由細到大睇過咁多套電影，最深刻嘅係小學生時睇嘅《反斗奇兵》，從此愛上戲中嘅「牛仔胡迪」。不過，第二集同依家上映緊嘅第三集，佢都分別等足四年同十一年，等到頸都長。
《反斗奇兵》闊別十一年咁耐，加讚都話自己變咗心，鍾意嘅角色已由牛仔胡迪變成薯蛋頭先生同太太，仲有恐龍泡泡龍，相當可愛。加讚話嚟緊仲會去睇埋里安納度狄卡比奧主演嘅《潛行凶間》。加讚細個之所以成日去睇戲，皆因佢媽咪蔡李惠莉係個戲迷，經常帶加讚去睇戲，反而蔡生就鍾意靜，加上公司業務繁忙，好少一齊外出睇戲。
不過，蔡太每逢睇過乜嘢好戲，都會等影碟推出時買番隻返屋企同蔡生分享，佢話好戲不妨一睇再睇。