政情：譚志源瑞士故地重遊
特首辦現正招聘一個專門負責管理特首facebook同網站嘅項目主任，每個月薪水有成二萬三千至二萬七千蚊，都咪話唔吸引。負責統籌整件事嘅特首辦主任譚志源（Raymond）前一排放咗兩個星期假，同屋企人去咗法國巴黎同瑞士日內瓦，事後仲將靚相上載去自己facebook。睇番資料，譚志源先後兩次派駐日內瓦，今次算係故地重遊。
Raymond九一至九四、九八至○一年被派駐過日內瓦，囡囡出生無幾耐就跟佢過咗瑞士，一路讀到小一，而細仔就更加係喺當地出世，亦喺當地讀幼稚園。今次一家人故地重遊，除咗去舊屋同囡囡讀過嘅小學緬懷一番，Raymond仲特登去一間叫「福祿壽」嘅中菜館食飯，呢間菜館好出名，佢喺日內瓦工作時仲不時喺嗰度宴請外國代表，難怪記憶猶新。
調返香港之後，Raymond○九年雖然去過日內瓦開會，但三、四日都困喺酒店，無機會遊覽，家人就未返過。今次放大假，Raymond一家去埋法國，喺巴黎遊覽著名嘅聖母院，返嚟之後仲貼埋靚相出嚟！