政情：鄭錦鐘獅城暢游空中泳池
保良局副主席鄭錦鐘（Eric）有個溫馨家庭，大仔鄭泳舜上月中生日，Eric拉隊去新加坡歎世界，入住開業只有個幾月嘅「濱海灣金沙酒店」，喺五十五樓空中花園試游全世界最大戶外泳池。人生首次居高臨下游水，Eric話，好彩冇畏高症喎。
Eric早年投資新加坡，係當地半個地頭蟲，今次度假，揀咗距離獅城只有一小時船程嘅民丹島，同行仲有太太、大仔、新抱及大孫。民丹島碧海藍天，Eric趁機同太太打番場高球，打完波後，再坐船返新加坡濱海灣中心區，事關著名嘅「濱海灣金沙酒店」新開張，裝修堂皇，Eric租咗幾晚歎世界，房租每晚約二千港元。
Eric讚新酒店物有所值，租客可免費參觀建喺五十五層大廈頂端嘅空中花園，仲有一百五十米泳池供住客暢泳。酒店仲設有大型賭場，Eric本來無諗住賭錢，但話晒一場嚟到，聽太太話落注一百元坡紙買咗一鋪「細」，結果贏咗五百港元，見好就收，拉隊去擦番餐著名胡椒蟹。