政情：林健鋒搞活動烏雲蓋頂
港府去年撥款一億成立盛事基金，專畀本地非牟利組織申請資助舉辦大型國際活動，唔經唔覺已經搞咗好幾個活動，不過就唔多順利。好似喺首輪撥款中最矚目嘅項目、撥款上限成千萬嘅ＬＶ帆船賽，前日就取消香港站賽事，令不少人失望。其實盛事基金支持嘅幾項活動都唔多順利，睇嚟身兼盛事基金評審委員會主席嘅經濟動力立法會議員林健鋒（Jeffrey）都幾黑仔。
盛事基金去年十月批出二千五百幾萬元搞六個大型項目，ＬＶ帆船賽同今年三月搞嘅梅窩天燈水燈節，都係市民引頸以待嘅項目。不過天燈節率先觸礁，成個活動諗住吸引四萬人參觀，點知最後得二萬幾人去，人數遠遠唔達標。加上香港航空交通繁忙，放天燈有諸多限制，唔可以一次放超過四個天燈，又唔可以放得太高，搞到睇過嘅市民都大叫冇癮。最慘嘅係，打算用嚟打破世界紀錄以提升知名度嘅「巨型天燈」，未離地已經自焚，認真陰功。兩個活動都「爛尾」收場，認真令人心傷。
阿Ｑ精神 自言冇壓力
其實基金贊助嘅項目都有旺場嘅時候。好似上個月搞嘅龍舟嘉年華，就成功吸引咗十幾萬人參觀。不過，當時「惡導遊」阿珍強迫遊客購物事件炒得正熱，所以新聞焦點都去晒阿珍度，個龍舟嘉年華搞得幾好都畀阿珍嘅新聞蓋過咗，又再喪失成名機會，真係想唔話Jeffrey黑仔都唔得。
不如意事一浪接一浪，但Jeffrey就好阿Ｑ，話唔覺得自己黑仔。佢話雖然ＬＶ帆船賽搞唔成好可惜，但又唔止香港一個站取消咗，美國聖地牙哥及俄羅斯索契（Sochi）嘅賽事都取消咗，所以都唔強求。佢仲話，如果真係黑仔，賽事就改咗去香港最大嘅競爭對手新加坡度搞喎！至於其他「黑仔」事件，Jeffrey就笑笑口唔回應，只係話發生咩事都好，都唔會對佢審批基金構成壓力。正所謂「天將降大任於斯人也，都必先苦其心志，勞其筋骨」，所以「黑仔」幾次又有乜所謂，或者烏雲蓋頂嘅日子好快成為過去！