中環出更：莊家彬打理家業有板有眼
創業難，守業更難！現時富豪二、三代除咗要守住盤家族生意外，仲要投身青年工作，莊士集團太子爺莊家彬（Albert）就係個例子。卓妮每次喺菁英會活動上遇到Albert，都見佢做得好投入，但原來佢幫爸爸打理家族地產生意更加投入，由推銷樓盤以至帶客人睇樓都係親力親為，兼且做出好成績，相信最開心都係佢爸爸。
獨立屋4.6億成交
Albert現時為莊士集團執行董事兼首席營運總監。卓妮前日喺菁英會新一屆執委會就職禮上見到Albert，佢話現時專注集團地產業務，近日忙於推售旗下南區香島道三十七號嘅四幢獨立屋。Albert好雀躍話，喺前日（六日）以四億六千二百八十萬元售出D號屋，現正就C號屋同幾個大客傾緊，成事機會好大。至於餘下A及B兩幢獨立屋，佢話會保留作為集團長線投資。
其實早前莊士集團推出紅磡「蕪湖居」單幢新盤時，Albert都親自督師，至今已成功售出六、七成單位，並計劃再接再厲，本月尾再加推高層單位。Albert話，紅磡將來有沙中線，又近火車站及理工大學，方便經常穿梭中港兩地嘅人士，加上提供酒店式管理服務，吸引力大大提升。佢話集團手頭上仲有幾個地產項目，陸續有嚟！聽Albert嘅語氣，似乎愈做愈起勁！
問Albert點睇樓市去向，佢就話阿爸教落，樓市好景時，唔好睇得太好；樓市差時，又唔好睇得太差，但以目前市況，佢有信心樓市可以穩步發展。Albert咁生性，睇嚟世伯可以飲得杯落囉！