中環出更：細佬揸車惹官非 啟剛力撐講好話
立法會議員霍震霆（Timothy）細仔霍啟人早前涉嫌酒後駕駛撞車，下月要返警署報到，影響幾大都未知，但霍家不忘為啟人講好說話，希望啟人能吸取教訓。慈父Tim霍叮囑啟人以後揸車要醒定啲，慈母朱玲玲更加無鬧過啟人，唔知做大哥嘅啟剛又點睇呢？
香港菁英會前日舉行第三屆就職禮，卓妮見到副主席啟剛，當然要關心吓啟人單嘢嘅發展啦！問啟剛事後有無鬧啟人幾句，佢就對啟人投信任票：「鬧佢？無呀！佢都廿幾歲人啦，識諗㗎喇。」跟住佢又幫細佬講好說話：「細路仔揸車發生意外就梗有啦，佢以後都會小心揸車㗎喇！」
啟剛本月十四日會以團長身份，率領十五名運動員到新加坡參加首屆青年奧運會（Young Olympic Game），總共參加八個項目。啟剛首次領軍，唔知Tim霍有乜錦囊相贈呢？啟剛話，由於運動員平均年齡為十四至十八歲，首要係安全至上，要好好照顧每一個運動員，唔希望有任何意外發生，個個平安返港。
薛嘉麟替范駿華辯護
卓妮當晚仲見到Neway太子爺薛嘉麟，問起佢老友范駿華（Andrew）喺o靚模船河派對後少咗露面，薛嘉麟話：「你哋見唔到佢啫，我仲有同佢聯絡呀！」咁唔知Andrew有無畀老婆扭耳仔呢？薛嘉麟就咁講：「平生不作虧心事，半夜敲門也不驚。」未結婚就話「敲門也不驚」啫，但Andrew結咗婚喎？薛嘉麟繼續幫老友講嘢，佢話：「呢單嘢係畀人整蠱㗎！」唔知邊個咁大整蠱呢？
轉頭卓妮又見到啱啱做咗太平紳士嘅百仁基金副主席陳寧寧。陳寧寧話，幾年前曾經喺玄學家建議下，將姓名最後一個「寧」字改成「濘」字，認為有助吸財，但後來嫌改名麻煩而告吹。
卓妮