政情：關景鴻話係時候出貨
恒生銀行女大班梁高美懿形容香港樓市變得好唔現實，相信支持同反對嘅人有排拗，尋日我哋見到景鴻移民顧問創辦人關景鴻，佢力撐投資移民政策對香港經濟有刺激作用，樓市短期唔會點跌，但問佢會唔會趁機入番啲貨，佢就笑謂：「對我嚟講，依家係出貨時機啦！」擺明係趁高套現，睇淡樓市啦！
尋日關景鴻出席首屆亞洲美饌大師迎亞運公開賽——名人明星賽，親自落場炮製美食，為廣州亞運宣傳造勢。近年香港空氣質素愈嚟愈差，好多老外都唔肯留低，咁有冇多咗人移民外國呢？關景鴻話冇喎，多咗啲內地人移民嚟香港就真。佢又話投資移民門檻遲啲可能由依家嘅六百五十萬元再加高，到時可以刺激香港經濟同埋樓市，所以佢認為樓價唔會點跌，不過港府都應該做啲嘢穩定吓樓市。
既然未來樓市有咁強勁嘅移民大軍撐住，一向對買樓投資甚有心得嘅關生，應該趁機入多啲貨，點知佢反而笑謂要出貨。有心置業嘅市民，真係應該小心啲喇。