政情：時薪廿蚊講極都唔完
立法會飲食界代表張宇人形容最低工資水平訂於時薪二十蚊對企業殺傷力無咁大，引起全城怒吼。前日有小餐廳老闆同自由黨講，依家畀緊時薪廿蚊至廿二蚊，如果加到廿四至廿五蚊，就要縮減伙記工時。原來到處都係廿蚊張，張宇人的確係為業界發聲喎。
一位喺元朗經營菜館嘅小老闆前排主動聯絡自由黨主席劉健儀（Miriam），想傾吓最低工資嘅問題。前日Miriam就拉埋喺新界西積極做地區工作嘅自由黨常委田北辰，一齊同一群餐廳老闆坐低傾。
席間幾位餐廳老闆都話，依家佢哋啲伙記嘅時薪，大約二十蚊至廿二蚊，如果加到廿四至廿五蚊，佢哋就要減低伙記工時嚟維皮，一旦加到廿八至廿九蚊，更加要裁員先掂。
張宇人因為廿蚊引起公憤，全城圍插，被人封為「廿蚊張」兼掟廿蚊紙，連分屬黨友嘅Miriam都要出嚟同佢劃清界線，建議將最低工資訂為廿四蚊，結果張宇人向公眾道歉。家陣有小餐廳老闆出嚟話時薪廿蚊先掂，相信最開心嘅都係張宇人啦！