政情：十六浦MJ咖啡館開幕
澳門十六浦嘅米高積遜（MJ）熱潮浪接浪，繼今年二月米高積遜珍品廊開幕後，米高積遜咖啡館前日又開幕，呢間係中、港、澳唯一以MJ為主題嘅咖啡館，勢掀起另一番MJ熱潮。十六浦度假村酒店主席蘇樹輝話，MJ咖啡館為全球嘅MJ歌迷增加一個聚腳點，相信會吸引更多MJ歌迷及旅客前往十六浦。
雞尾特飲 唱片命名
咖啡館喺十六浦一樓，以MJ最喜愛嘅紅色和黑色為主調，營造出強烈嘅舞台感覺。館內掛滿MJ嘅舞步連環照，並展示MJ經典嘅舞台服飾。咖啡館精挑世界頂級咖啡豆，即叫即磨，並有其他特飲選擇，包括以MJ唱片名稱「Thriller」及「Invincible」命名嘅雞尾特飲。
現凡於十六浦米高積遜咖啡館惠顧滿二十澳門元，十六浦將捐贈一元畀澳門特殊奧運會，既可同MJ迷聚首，又可做善事，確係一舉兩得。