政情：工聯會搞長跑吸新血

工聯會立法會議員葉偉明透露，工聯會十一月廿一日會喺機場範圍搞一場十公里長跑比賽，暫預定二千人參加，今次活動主要係為工聯會屬下嘅職安基金籌款，而路線暫時仲未落實，不過應該會喺東岸路至亞洲博覽館一帶比賽。睇番資料，對上一次工聯會搞大型長跑比賽係兩年前，當時係為咗慶祝工聯會成立六十周年同迎接奧運而舉辦。

青委負責 對象鮮明

長跑近年愈來愈受歡迎，加上可以寓運動於籌款，相信善款數字應該可以幾理想。葉偉明就話，籌款數字唔重要，做善事多多益善、少少無拘，而且好幾間航空公司已答應捐款支持，相信善款數字唔會太差。呢次長跑係由工聯會青年事務委員會、屬下民航工會同機管局合辦，由得青委搞，對象好明顯就係年輕人啦，唔通工聯會想藉住比賽引起年輕人注意？工聯會另一個立法會議員潘佩璆承認，佢哋一向都積極吸納年輕人，加上長跑運動咁健康，做多啲都冇壞喎。

今次比賽要跑十公里，唔知工聯會內部有邊個會參加呢？潘佩璆就話，近兩年自己少咗鍛煉，所以唔會參加今次比賽，不過佢喺入立法會之前其實成日都練跑，仲年年參加馬拉松添。至於搞手之一嘅葉偉明就暫時未知落唔落場，佢近來積極減磅，如果到時成績理想的話，一定會身體力行支持。

葉偉明仲透露，暫時未定出嘉賓名單，不過會長鄭耀棠同理事長吳秋北一定有份，佢仲會呼籲所有工聯會議員出席，以示支持同壯大聲勢。工聯會今次用心搞長跑，證明吸引後生仔唔一定只靠電腦同互聯網，有時返璞歸真搞番運動比賽都唔錯吖，至少可以塑造到年輕有活力嘅形象嘛。