中環出更：小廚老闆師承廣東名食家
以傳統精緻粵菜馳名嘅桃花源小廚來頭不小，老細Tim哥曾經喺恒生銀行總行博愛堂工作三十三年，直至二○○○年自立門戶。好多城中名廚來自恒生，好似國金軒行政總廚李煜霖就係Tim哥嘅師兄，佢哋都係廣東知名食家江太史家廚李才嘅徒弟。
炮製粵菜唔使太花巧
恒生博愛堂招呼嘅賓客非富則貴，幾十年來以精緻粵菜聞名，秋季至有嘅蛇宴更加係老饕必食之選。Tim哥笑言，佢淨係識得恒生嗰套，所以桃花源一脈相傳，太史蛇羹都係經典菜式之一，難怪一班身嬌肉貴嘅食客不離不棄。
Tim哥見老友黃帆風嚟幫襯，梗要坐低傾一陣，仲大方教路炮製廣東菜嘅三個秘訣：「新鮮、簡單、夠熱」，唔需要太花巧。佢感慨好多傳統美食正在消失，黃主席甚有共鳴，仲自爆假期經常親自落街市買餸，尋找買少見少嘅食材添！
桃花源舊舖位於蘇杭街，食客要兩星期前訂枱。依家新舖上下兩層共百幾個位，以後街客唔使經常失望而回啦！
卓妮