中環出更：星級桃花源黃帆風誓追隨
米芝蓮二星餐廳桃花源小廚（Tim's Kitchen）最近搬新竇，卓妮約埋好姊妹去歎午膳，咁啱撞到博愛醫院主席黃帆風伉儷同身兼行政會議成員嘅立法會議員劉江華，佢哋分別約咗朋友喺度開飯。黃帆風笑謂，佢追隨桃花源創辦人兼廚藝總監黎有甜（Tim哥）多年，以前舊舖經常滿座，佢同太太就算坐冷巷都唔介意，係桃花源嘅忠實擁躉。
當日黃帆風特登設宴慰勞博愛高層，包括總幹事鄺國光同埋中醫藥及社會服務總監吳凱孚，仲推介佢同太太至愛嘅七彩炒肚尖、冬瓜蒸蟹鉗、玻璃明蝦球等馳名菜式同大家分享。黃主席話，幾年前朋友喺度請客，佢一試就愛上，經常同太太、朋友嚟幫襯。
黃太都係識飲識食一族，講起食經絕對唔輸蝕畀老公，唔使睇菜牌都可以點到成枱餸。佢至愛呢度嘅招牌菜式冬瓜蒸蟹鉗，材料係揀選肉質豐厚嘅靚蟹，佐以上湯熬煮嘅冬瓜蓉，入口清甜消暑，啱晒依家盛暑時節享用。
玻璃明蝦球 四太至愛
玻璃明蝦球都係桃花源嘅經典佳餚，佢哋選用一斤只得三隻嘅虎蝦，晶瑩剔透嘅虎蝦配以雲腿，視覺同味覺一樣咁令人滿足。呢味餸都係賭王四太嘅最愛，聽聞四太因此力邀桃花源小廚去澳門開分店添！
博愛近年銳意拓展中醫服務，黃主席喺今年四月上任後，乘勝追擊推出咗好多創新服務，包括全球首創嘅免費針灸戒煙計劃，卓妮梗要追問進展如何。黃主席話，計畫推出後反應甚好，輪候名單已多達三百人，遲啲佢哋就會公布初步嘅成效嘞！
當日劉江華都約咗朋友食飯，佢至愛呢度嘅八寶鴨同埋桂花炒魚翅，不過八寶鴨需要提早預定，佢話午飯簡簡單單就得啦！
卓妮