「有冇當我係人」港龍空勤抗議
【本報訊】港龍航空爆發工潮！逾二百名港龍空中服務員不滿編更混亂，員工需經常持續執勤，昨發動大規模示威行動，有員工更聲淚俱下控訴執勤期間完全沒有時間飲水、進食及如廁，斥港龍管理層「有冇當我係人先？」工會前日與資方磋商但未能達成共識，揚言若未獲滿意答覆將不排除發動罷工。
逾二百名休班港龍空勤人員身穿白衣及戴上紅帽，於機場離境大堂抗議，圍繞港龍櫃枱高舉橫額及高叫口號。港龍空勤人員協會主席潘芸妮批評，公司長期人手短缺，近月旅遊旺季員工更需持續執勤，令員工「有開工冇收工」，「有時飛完十幾個鐘，休息得十一個半鐘又要再飛，執勤時工作太多，休息、進食及如廁嘅時間都冇，希望公司尊重我哋多啲。」工會昨將近千名員工簽署及請願信遞交行政總裁唐偉邦，若回覆未令員工滿意，不排除將行動升級至按章工作及罷工。
飲水如廁無時間
在港龍工作約三年的蔡小姐，不滿公司在增加航班及服務卻未有增聘人手，「兩個鐘內要派餐、派飲品又要賣免稅品，以前一班機有十三人，依家得十人去服務二百個客，千手觀音都做唔到啦！根本唔當我哋係人！」她因經常無法如廁而患上尿道炎，又患鼻敏感及腰背痛，但憂慮被列入黑名單而不敢請病假。另有員工批評現時時薪為五十九元，每年僅加一元，又要求員工假期上班，只以「答謝卡」作報酬，以換取在旺季優先請假，做法絕不人道。
港龍行政總裁唐偉邦稱，深切體會員工的工作量，已推出措施紓緩員工壓力，亦會繼續聆聽員工的意見。港龍發聲明指，因近期航班延誤嚴重令人手緊張，已提供交通津貼及自願延遲年假等措施，並增聘七十名機艙服務員於十月投入服務。
