自爆出惡導遊「阿珍」事件後，旅遊業議會不斷畀外界轟監管不力，依家就連運輸界都唔放過佢哋。的士小巴權益關注大聯盟主席黎銘洪不滿旅議會濫權兼自己友管自己友，尋日就寄咗封信畀立法會，要求港府撤回旅議會嘅一切權力。
黎銘洪話，的士小巴業界同旅遊業絕對唔係冇關係，事關佢哋每日都載唔少內地客呢度去嗰度去。不過佢就話，佢咁唔滿意旅議會，係因為佢一位親戚嘅遭遇。佢話有位親戚喺一個商場擺檔賣香水，因有部分商品被海關懷疑係假貨而遭調查，點知旅議會喺海關未有判決前，即勒令所有轄下旅行社唔可以去嗰個商場購物，令其他無辜嘅商戶都遭殃。黎銘洪好嬲旅議會扮「法官」：「海關都未判，佢憑咩咁做？期間嘅損失邊個負責？」
黎銘洪話立法會旅遊界代表謝偉俊收到佢封信已即時覆咗佢，睇嚟一向同旅議會過唔去嘅謝偉俊又有多啲子彈去射旅議會落嚟喎。