政情：陳健波倡教學生理財
末代會考放榜，成績差嘅考生一定好徬徨。當年預科畢業後自學上位嘅立法會保險界議員陳健波就勉勵考生，話學歷只係打工嘅入場券，最重要係做事要抵得諗、夠投入，公餘不斷進修，自然會受到賞識。咁健波當年會考成績又點呢？原來有四個Ｂ，其他科就攞Ｄ，計六科都有二十分，照計成績都唔差，但健波就唔多滿意個教育制度。
健波憶述，佢七二年會考，當年讀書好辛苦，仲走去讀「雞精班」，但考完之後就忘記晒，全係為考試而考試，以前讀書最有用就係中英文，數學都只係學識加減乘除，時至今日，佢認為學校應該教吓學生理財，例如教吓保險、銀行運作、財經知識等，唔好乜都矇查查。
同係五散人立法會議員嘅林大輝係林大輝學校嘅校監，佢話由於中學改制，會考成績唔理想嘅同學如果想重讀就要適應新學制，但係實在難為咗呢班學生，佢間中學今年特別通融，收番分數未達要求嘅學生讀中六，免卻佢哋徬徨無助，佢話搞教育，就應該係咁樣。