政情：鼠王芬維也納遇貴人
去旅行最忌就係唔見手機或相機，唔單止掃興，最慘係唔見晒所有值得紀念嘅相片。立法會議員梁美芬剛剛同家人遊維也納時，就遇上呢個慘痛經歷，不過佢哋好好彩咁遇上好人司機，將佢大仔唔見咗嘅手機完璧歸趙；失而復得，自然零舍開心啦！
鼠王芬早前一家四口暢遊奧地利、法國同荷蘭三個歐洲國家抖暑，行程仲極其豐富。佢丈夫城大法學院院長王貴國，仲成為呢個世紀第一個喺海牙國際法庭演講嘅華人添，不過入場聽嘅囝囝就話太深，聽唔明喎。
鼠王芬話最難忘嘅，係佢大仔喺維也納「失而復得」嘅經歷。佢話囝囝喺旅遊期間用手機影咗好多相，所以唔見咗部機好心痛。佢哋兜勻維也納都搵唔到，打算放棄之際，第二朝個的士司機竟然將部機送番去酒店。佢大讚維也納民風淳樸，令佢好感動喎。歐遊完畢，鼠王芬旋即再戰內蒙繼續玩，真係令人羨慕！